到底寫字值幾錢？我是毫無頭緒的。倒是想起幾件事：
一、
好多年前搞文社，攞到舊錢返嚟夠印刷。排版設計的朋友仔問起酬勞，寫文嘅朋友仔同問有無稿酬？很遺憾當時年少不懂處理，最終兩者皆無酬。
＊在此事中，作者、設計師、編輯全都是消費者，我們都在消費印刷業。
二、
撈copywriter，𢭃月薪寫稿，旺季時稿量多所以很賤，淡季時稿很少就成了薪水小偷，拉勻全年就係個賤價的薪水小偷。
＊在公司內，創作人只是被剝削的齒輪。
三、
輾轉做過文學雜誌，稿酬在計劃書寫定了，約是$0.6-0.8/字，詩以行計，編輯是賤價中的賤價。
＊在這裡，搞雜誌的人是消費者，創作人是生產者。
四、
食開freelance 的舊同學很看得起我，久不久會叫我報價，問我寫文案的收費要怎樣計？實際上她接的job 比我要多很多，我報給她的都是隨心價，通常比$1/字高，但更常包影相、三次修改。
＊在合作關係之中，我都抱all or none 心態，一定不會自己剝削自己。
.
五、
又因為撈過編輯，有不少朋友出過書。一本書靚靚仔仔，成本只係4萬起跳。大概係中學老師一個月人工，雖然風險有限，但大家食慣資助，所以無乜大賺嘅打算同壓力。
＊自資出版來說，滯銷的作者是消費者，編輯、設計、印刷是生產者；暢銷的作者才是生產者。
＊獲資助的出版物，作者是幸福的消費者。
六、
跟過幾壇資助計劃，稿酬變動都頗大。有試過按篇章定額出版權費，有試過按字數出。也遇過計劃持份者第二邊使大咗想cut 稿費，又遇過一句「我就係總監」打橫行嘅，私相授受式見朋友喺facebook share 出個post 都撳$500 當宣傳費。
＊資助計劃中，能否體現對創作者的尊重，就靠行政人員的做化。遺憾的是，團體一般欠缺監管，行政人員做得再差，都可以擺爛罵返人「乜都無做過」。
七、
有年年話有機攞諾貝爾文學獎的大前輩早前出書徵畫，其編輯先戴頭罩話自己無酬做，徵畫都無酬。最終收夠畫稿，亦都出到畫酬。
八、
多謝你睇到呢到，最後小總結想講嘅嘢：
A）如果大家靠資助先生存到，就永遠討論唔到咩叫尊重同合理
B）如果大家再一直靠資助，大家都會覺得自己好辛苦又不被重視
C）大家再食資助，就繼續無法長遠規劃行業、組織、人才的發展
九、
到底收幾多錢好呢？我認為文章同音樂在消費的層面上相似，目前都係可複製而無損質素的東西。開adblock 上YouTube 聽my little airport 唔使錢，我都唔知道佢哋點收錢。我有以下建議：
A）收自己想收嘅，唔夠一律唔寫
B）開Patreon 自私收
C）接受寫作係間接掙取收入的途徑，成名起朵做KOL 搞讀書會講座工作坊搵
沒有留言:
發佈留言