相信社群

 

Let it be 最近在辦一個社區藝術活動，邀請街坊啡友留下一幀上水的相片，或者加入一小段文字解說。展出已有半個多月，收來的照片逐漸佔據白得耀眼的牆壁。過去工作與地景文學、社群藝術相關，做久了卻又覺得自身的想法與主流的做法愈來愈大落差，還是這種重視參與的較合我的喜好。

有些留言是這樣的：

「2023.May.涼　Chur咗一整日之後，番到上水會唔想番屋企住，係深夜無咩人嘅街上行，深呼吸放空，可以讓我從臨臨種種嘅事情「回到當下」。望熟悉不過的街景，抬頭發現又到鳳凰花開嘅季節了：）掂下啲樹木，幫到我沉穩番長期泘燥嘅心情：）」——Marjorie Li

「2023/5/22　以前上水廣場有間通利琴行，好唔願意咁練完琴，去埋商務睇吓書，再落去留下KFC食個肥仔餐，咁就一日！　上水名店～『星光影音器材公司』」——甘

「睇到有人話曾經好怕，好討厭上水。　直到COVID來臨，上水無咗水貨客，Let it be出現，上水終於係有寧靜嘅地方！好同意呀！靜落嚟望，其實上水好靚呀！ 諗起細細個，星期日family day，去街市/ 酒樓食完晏，爸爸就會帶我同細佬去舊墟買零食（有間叫廣安堂嘅舖，有冇人記得？已執），買吓日用品，第二朝早餐麵包。開關前，有晚搭車經過龍豐，望住酒樓、巷仔（條賣生果等等嘅巷）、even斑馬線，都覺得好靚！嗰晚我望住忍唔住心裏面講：其實，上水都、幾靚㗎喎⋯⋯（90後成年後第一次覺得）（即係中學時期都係討厭的，因為好多水貨客、行李箱、垃圾！）平時嚟親 Let it be 都係匆匆忙忙，今日難得有時間逗留咁耐，睇相&字睇有有D感動⋯⋯ Thank you Let it be!」——H

讀著讀著便想起不久前聽前輩說過，搞工作坊到真要寫的時候，好多時係街坊害羞，覺得所寫的談不上art piece，故在前期要做許多熱身；但更多時候，係我哋唔相信嗰啲嘢係文學，作品當然可以再加提煉編改，但本身真情實感的東西，為何不是？

因而我們才常有那種關於社群先行，抑或藝術先行的討論，我向來較傾向社群先行。畢竟談到「藝術先行」時，行內最普遍的情況還是「藝術家先行」，只要是叫得出名的人的作品就當成可用、具質素，儘管它不過是藝術家走馬看花地提起地點的文字練習，換個地名內容幾乎區區可用。

或者未來再有機會帶這兒的文學散步，想要描述疫情時期這個社區的遽變和寧靜時，這些街坊的作品又會連結到未來嚮往舊墟生活的人。